Bartzelonako Euskal Etxeak antolatuta, apirilaren 23tik maiatzaren 28ra euskal literaturari eskainitako Literaldia 2014 jaialdia burutuko da Bartzelonan. Aurten gainera, euskal literatura ezagutarazteko xedearekin antolatzen den egitasmoak hamar urte betetzen ditu. Literatura, musika, dantza, erakusketak eta bestelako diziplinak biltzen ditu azpian duzuen programak.

Ander Mendiak eta Aitor Arenasek Txinako “King Bonn, 5th China International New Media Short Film Festival” jaialdian parte hartuko dute. Euren lanak futbol-zelai bateko pantaila erraldoian emango dituzte, Guan Ming New District-en.

Mendiak “Beerbug” lana aurkeztu du, Arenasek, berriz, “Jugando con la muerte” laburmetraia.

Aurtengo Nantesko Festival du Cinéma Espagnol jaialdiak inoizko euskal partaidetzarik handiena izango du. Euskal zinemari eskainitako Fenêtre Basque sailak programa mardula izateaz gain –zortzi film luze, hauetako bi sarituak izateko aukerekin eta Kimuak 2013 bildumako zazpi film labur, hiru lan sarituen zerrenda ofizialean sartzeko aukerekin-,  Alex De la Iglesia. La passion de tourner liburuaren aurkezpena ere hartuko du bere baitan. Rouge Profond argitaletxeak editatu du jaialdia bera, Euskadiko Filmategia eta  Etxepare Euskal Institutuarekin elkarlanean. Euskal zinemaz argitaratzen den gisa honetako lehen liburua da, frantzesera itzuli dena eta zabalkunde internazionala izango duena. Gainera, jaialdiko Filmer au féminin/Le féminin filmé atalean bi euskal produkzio sartu dituzte, bertako jarduera ezberdinetan zinemagile euskaldunen partaidetza izango da, eta beste hiru euskal film ere eskainiko dira jaialdiko hainbat ataletan, Panorama sailean kasu. Hau gutxi balitz, Barbara Goenaga izango da epaimahaiko buru eta Imanol Uribe epaimahaikide.

Aitor eta Amaia Merinok zuzendutako Asier eta Biok filma Argentinako Buenos Aireseko BAFICI zinemaldian emango dute (apirilak 2-13), Panorama sailaren baitan. Giza Eskubideen Sarirako lehiatuko da, gainera.

Urtero bezala, Poznaneko Adam Mickiewicz Unibertsitateko euskara ikasleek Euskal Jaia antolatu dute, apirilaren 9tik 11era. Jaialdiaren helburu nagusienetakoa unibertsitatetik kanpo euskal kultura ezagutaraztea da. Horregatik, ospakizunaren alderdi garrantzitsuenetako bat kanpo eragileekin harreman estuan egotea da. Aurtengo progeaman, besteak beste, aipa daitezke Karawana Opowiesci ipuin kontalari taldearekin egindako ipuin kontaketa, Muza Zinema erreferentziazko aretoan eskainiko den Gazta Zati Bat filma (ikasleek polonierara egindako azpitituluekin), Skad Bierzesz Bialko kolektibo beganoak prestatutako janaria, SuperMemo argitaletxearekin batera antolatutako euskal kulturari buruzko online leihaketa, Fzientzia eta Artearen festibalaren baitan eskainiko den euskara eskola irekia, Bal Folk Poznan taldearekin elkarlanean antolatu den dantza tailerra, Pika Pika tabernan egingo den ardo dastaketa eta pintxo leihaketa eta baita Dragon eta Glosna klub ezagunekin egindako elkarlana:  bertan izango dira hitzaldiak, kulturari buruzko eztabaidak, eta euskal festa.

Badira urte batzuk Etxepare Institutua eta Mexikoko Guadalajarako Nazioarteko Zinemaldia  harremanetan jarri zirela, jaialdiak euskal zinea har zezan; geroztik ez da euskal filmerik falta izan programan. Ezta aurten ere: Sail Ofizialeko Iberoamerikar Dokumentalak atalak Alfonso Andres eta Javier Barajas zuzendarien Esbastika bat Bidasoan eskainiko du. Alfonso Andresek berak aurkeztuko du pelikula bertan, Institutuaren babesarekin. Filmak zenbait goi-kargu nazik euskaldunengan azaldu zuten interesa du ardatz; izaera antropologikoko hainbat film dokumental egin zituzten Euskal Herrian 40. hamarkadan, eta haietatik geratzen den bakarra, Im lande der Basken (Euskaldunen lurraldean) hartzen du abiapuntutzat. Bestalde, Donostiako Zinemaldian banatzen den Sebastiane Saria ekimeneko arduradunak Guadalajarako Zinemaldian  LGBTTTI gaiak jorratzen dituzten pelikula onenak saritzen dituen Maguey Sarian   partaide izango dira aurten. Jaialdia gaur hasiko da.

Poloniako Gdansk hiriko Etnologia Museoak euskal gaiekin lotutako eguna antolatu du martxoaren 29rako, "Dzien Baskijski" izenburupean. Katarzyna Mirgos eta Amaia Donés Mendia Adam Mickiewicz unibertsitateko irakasleek -bigarrena Etxepare Euskal Institutuko Euskara eta Euskal Kultura irakurlea- hitzaldiak eta tailerrak emango dituzte, Poloniako hiri horretan euskal kultura ezagutzera emateko. Kimuak euskal film laburren hautaketako lan batzuk ere eskainiko dituzte programaren baitan.

EUSKARA ESKOLA

Corkeko unibertsitatean Euskal zinema zikloa antolatu dute martxorako, Leire Orduna Etxepare Euskal Institutuak Irlandan duen Euskara eta Euskal Kultura irakurleak jakinarazi digunez.  Gartxot, 80 egunean, Gazta zati bat eta Bertsolari filmak proiektatuko dituzte. Azpian dituzue datak:

Gartxot - martxoak 3 astelehena

80 egunean - martxoak 10 astelehena

Gazta zati bat - martxoak 18 asteartea

Bertsolari - martxoak 24 astelehena

Hungariako Szegedeko Unibertsitateak “Cinema Paradiso” zine ziklo eleaniztuna eskainiko du martxoan: sei pelikula izango dira ikusgai, sei hizkuntza ezberdinetan. Etxepare Institutuak bertan duen Euskara eta Euskal Kultura irakurle den Oxel Uribe-Etxebarriaren partaidetzari esker, horietako bat Alberto J. Gorritiberearen Arriya (2011) euskal filma izango da. Emaldia martxoaren 20an izango da, Petöfi Sgt. 30-34 gunean, 18:00etan.