Antolakuntza

Komunikazio Zientzietan lizentziatua Nafarroako Unibertsitatean eta kulturaren eremuan ibilbide luzea egina, Irene Larraza Aizpuruak (Tolosa, 1970) erantzukizuneko lanpostuak bete izan ditu komunikazioaren eta kultur kudeaketaren eremuetan. Hasiera batean, Herri Irratian esatari eta erredaktore lanetan aritu zen hiru urtez. Ondoren, Donostiako Koldo Mitxelena Kulturuneko Sustapenaren eta Hedapenaren arduradun izan zen hiru urtez, eta zortzi urtez izan zen Syntorama musikarien ordezkaritza-agentziako Sustapenaren, Komunikazioaren eta Editorialaren arduradun. 2008 eta 2012 urte bitartean Tolosako Udalean garatu zuen bere ibilbide profesionala Kulturako Koordinatzaile eta Zuzendari gisa. 2012az geroztik, Etxepare Euskal Institutuaren taldeko kide da Larraza. Bertan, Komunikazio Arduraduna izan zen aurrena, eta 2016ko azaroaz geroztik Kulturaren Sustapen eta Hedapen Zuzendaria hurrena. 2018tik da Etxepare Euskal Institutuko zuzendaria.

Imanol Otaegi Mitxelena (Errenteria, 1979), Ikus-entzunezkoetan lizentziatua da eta Turismoan diplomaduna, eta 15 urte baino gehiago daramatza kultur alorrean lanean. Nazioarteko eskala duten proiekzio handiko kultur proiektuetan eskarmentua du, eta esperientzia zabala diziplina anitzetako kultur proiektuen ekoizpenean. Donostia / San Sebastián 2016 Fundazioan aritu zen hiru urtez atzerrian gauzatu ziren kultur proiektuen sortzaile eta koordinatzaile gisa. ETBrentzat egindako hainbat telesail eta entretenimendu saioren produktore bezala aritu da hainbat urtez, baita hainbat dantza eta antzerki ikuskizunetan ere. Halaber, Donostia Zinemaldian eta Eusko Jaurlaritzaren ikus entzunezkoen nazioarteko estrategia programan ere lan egindakoa da.

Monika Madinabeitia (Eskoriatza, 1971), Ingeles Filologian lizentziatua da (1994) eta Ipar Amerikako Mendebaldeko literaturan doktorea (2006), Euskal Herriko Unibertsitatean. 2005 urtetik Mondragon Unibertsitatean, Humanitate eta Hezkuntza Zientzien Fakultatean aritu da irakasle eta ikerlari. Identitateak, kultura, migrazioa eta euskal diasporak ditu ikergai. 2018an, ‘Petra, My Basque Grandmother’ liburu ilustratua argitaratu zuen, Nevada-Reno Unibertsitateko Euskal Ikasketen Zentroaren eskutik (AEB).