COVID-19aren aurrean, atzerriko online euskara eskolek gora egin dute

Euskara. Kultura. Mundura.

2020-05-19

Koronabirusak eragindako mundu-mailako larrialdi egoeraren aurrean, irakaskuntza sistemak sekulako ahaleginak egin ditu eskolak online plataformetara egokitzeko. Gauza bera egin du Etxepare Euskal Institutuak ere mundu osoan zehar kudeatzen dituen euskara eskolekin, bai Euskara Munduan programaren baitan, baita unibertsitateetako irakurletzen kasuan ere.

Atzerriko Euskal Etxeetako euskara eskolak kudeatzeaz arduratzen den Euskara Munduan programaren 2020rako helburuetako bat zen Europako eta Ameriketako euskara irakasleak eskolak online bidez eskaintzeko trebatzea. Horretarako, bi saio pilotu jarri ziren martxan Madrilgo eta Washingtoneko Euskal Etxe-sareetan larrialdi egoeraren aurretik, A 2.1 mailakoa bata eta A 1.1-ekoa bestea, zortzi eta 29 ikasleren partaidetzarekin hurrenez hurren. Pandemiak, ordea, egitaraua erabat aldatu du: munduko Euskal Etxe eta unibertsitate gehienak itxi egin dituzte eta, ondorioz, aurrez-aurreko eskolak bertan behera geratu dira, denak online metodoa hautatzera behartuz.

Gauzak horrela, egun mundu mailako Euskal Etxe eta unibertsitate gehienek euskara irakatsi eta zabaltzeko zereginean jarraitzen dute, plataforma ezberdinak erabiliz. AEB, Alemania, Argentina, Txile, Frantzia edota Kanadako zenbait Euskal Etxe eta Unibertsitatetan dagoeneko eskaintzen ari dira online bidezko eskolak, eta Tokio, Bartzelona, Mallorca edota Mexikok, besteak beste, jada erabilgarri dute online bidezko euskararen irakaskuntza, eta ikasleek izena emateko zain daude.

Etxepare Euskal Institutuko Euskara Sustatu eta Hedatzeko zuzendari Garbiñe Iztuetak alde ona ikusten dio fenomeno berri honi: “Euskara eta euskal kulturaren irakaskuntza eta ikaskuntza prozesua birpentsatzeko ariketa egitera eraman gaitu COVID-19aren krisiak eta, erronka teknologikoen aurrean, malgutasunak eta sormenerako gaitasunak duten balio izugarria ere agerian geratu da. Ikasleekin harremana eta ikasleen arteko harremana ikaste prozesuan ezinbesteko faktorea dela berretsi da, gainera, eta horregatik pantailaren bidez harreman hauek beste modu batera lantzeko oinarri baliotsuak identifikatzeko eta lantzeko garaia izaten ari da”.

Izan ere, atzerrian finkatuta dauden irakasle horiek lan handia egiten ari dira eskolak online eman ahal izateko. Alde batetik, tresna berriak erabili dituzte, hala nola Zoom, Skype edota unibertsitateak eskuragarri dituzten on line plataformak. Irlandako University College Cork-en dagoen Imanol Oteizak "Moodlea benetan aukera bikaina" dela dio, eta bere materiala osatzeko erabili duela. Halaber, Boise State Universityn dagoen Ziortza Gandariasek Zoom-en aldeko apustua egin du: "Zoom erabiltzea esperientzia bikaina izaten ari da, ikasleei asko gustatzen zaie".

Horrez gain, irakasteko eta ikasleen lana ebaluatzeko metodologia eta material berriak sortu dituzte. Esate baterako, Chicagoko Unibertsitatean dagoen irakurleak egoera honen aurrean azterketarik egingo ez duela erabaki du, eta lana ebaluatzeko blog bat sortu du, bertara ikasleek ikus-entzunezko proiektuak igo ditzaten. Halaber, Frankfurteko Goethe Unibertsitateko irakurleak on line aplikazioekin euskara ikasteko jokoak sortu ditu ikasleentzat.

Harpidetu gure Newsletterrera informazio gehiago jasotzeko

Harpidetu