Hay Festival Arequipa: Iban Zaldua

Hay Festival Arequipa hispaniar hizkuntzan egiten den kultur jaialdi garrantzitsuenetako bat da. Urtero Peruko hiri honetan hainbat diziplinatako idazle, zientzalari, artista eta pentsalariak biltzen ditu hitzaldi, tailer, kontzertu eta irakurketetan parte hartzeko, kultura-trukea eta pentsamendu kritikoa sustatuz.

Jaialdiaren hamargarren edizioa 2024ko azaroaren 7tik 10era egingo da, eta 17 herrialdetako 100 gonbidatu baino gehiagok hartuko dute parte.

Aurten ere Etxepare Euskal Institutuaren laguntza izango du jaialdiak euskal egileei ahotsa emateko. Iban Zaldua izango da edizio honetako gonbidatua.

Azaroaren 8an, Iban Zalduak, Volgako Batelariak literatur asaldura aldizkariko kide izandakoak, Gemma Ruiz Palá kazetari eta idazlearekin, Julio Villanueva Chang Etiqueta negra aldizkariaren sortzailearekin eta Felipe Restrepo Pombo idazle, kazetari eta Gatopardo aldizkariaren zuzendari ohiarekin hitz egingo du. Ekitaldia Centro Cultural Peruano Norteamericano kulturgunean izango da arratsaldeko 16:00etan (bertako ordua).

Azaroaren 9an berriz, ‘A escondidas’ aurkeztuko du, jatorriz ‘Inon ez, inoiz ez’ (2014) lanean argitaratutako kontakizunen bertsio berrikusi eta aberastua. Bilduma berri honek, euskaratik gaztelaniara egileak berak itzulitako bilduma berri honek fantastikoa eta erreala nahasten ditu, giza kontraesanak aztertzeko eta errealitatea deseraikiz hau iraultzeko. Umorea, klima-aldaketa eta adimen artifiziala bezalako gaiak jorratzen ditu.

Jorge Malpartida idazlea moderatzaile lanetan arituko den ekitaldi honetan, Rocio Santesteban idazle, poeta, akademiko eta Peruko kongresista ohiak ere parte hartuko du. ‘El Quemadero’ aurkeztuko du, bere narratiba laburraren bilduma.

Iban Zaldua

Iban Zaldua (Donostia, 1966), ipuin kontalaria da, batez ere. Bere liburuen artean, honako hauek nabarmentzen dira: ‘La isla de los antropólogos y otros relatos’ (Lengua de Trapo, 2002), ‘Itzalak’ (Erein, 2004), ‘Mentiras, mentiras, mentiras’ (Lengua de Trapo, 2006), ´Porvenir´ (Lengua de Trapo, 2007, Euskadi Literatura Saria), ‘Biodiskografiak’ (Erein, 2011), "Inon ez, inoiz ez" (Elkar, 2014) edota ‘Como si todo hubiera pasado’ (Galaxia Gutenberg, 2018). Era berean, ‘Si Sabino viviría’ (Lengua de Trapo, 2005) eta ‘La patria de todos los vascos’ (Lengua de Trapo, 2009) eleberriak idatzi ditu, baita ‘Ese idioma raro y poderoso’ (Lengua de Trapo, 2012, saiakerako Euskadi Saria) bezalako saiakerak ere. Argitaratu dituen azken lanak ‘Korrespondentziak’ trukaketa epistolarra, James Robertson idazle eskoziarrarekin (Erein-Etxepare Euskal Institutua, 2019) eta ‘Una visita al Museo de Armería’ (Azala-Etorkizuneko zirriborroak, 2020) kontakizun luzea izan dira. Volgako Batelariak literatur aldizkariko kide izan zen.