Bologna Children´s book fair: Basque. Books.

Bologna Children´s Book Fair Nazioarteko liburu azoka ospetsua martxoaren 6tik 9ra egingo da Bolonian. Bertan, Euskal Editoreen Elkartea eta Euskal Irudigileak elkartea izango dira, Basque. Books. markaren aterkipean.

1963an sortu zenetik, urtero antolatzen da azoka italiarra. Haur literaturan erreferentziazko ekitaldia da; 1.400 erakusmahai eta 30.000 bisitari inguru biltzen dira bertan urtero. Haur literaturaren sorkuntzan eta argitalpenean diharduten profesional guztien topagunea da, eta, batez ere, egile-eskubideak erosteko eta saltzeko espazioa da.

Euskal Editoreen Elkartea, sektoreko beste hainbat erakundeekin batera, Euskadiko Editoreen Gremioarekin eta  EuskalIrudigileen Elkartearekin, Basque. Books. markaren aterkipean egongo dira Bolonian, Eusko Jaurlaritzaren Kultura Sailaren eta Etxepare Euskal Institutuaren laguntzari esker. Basque.Books. euskal literaturaren eta argitalpen-industriaren nazioartekotzea bultzatzen duen marka da.

Euskal liburuen presentzia nabarmena izango da azokan aurten ere. Guztira, hamairu argitaletxek eman dute izena haien lana azokako stand batean erakusteko: A fin de cuentos, Alberdania, Bonito editorial, Ediciones Modernas El Embudo, Elkar, Erein, Fulgencio Pimentel, Ibaizabal, Ikaselkar, Ttarttalo, Txalaparta, Xarpa Books eta Xibarit.

Euskal Editoreen Elkarteak Children Book Fair azokako Basque.Books-en erakusmahaian ikusgarritasuna izango du. Horrez gain, programazioaren barruan hainbat jardueretan parte hartuko dute. Comics Corner atalean, euskal liburu eta irudigileen komikiak salgai egongo dira, eta Euskal liburuak eskubide eskuragarrien katalogoa banatuko dute.

Euskal Irudigileak elkarteak hainbat jarduera koordinatuko ditu Illustrator Survival Corner atalean, azokaren programazio profesional ofizialaren barruan. Euskal ilustratzaileek portafolioen errebisioetan, maisu-klaseetan eta Mostra degli illustratori entzutetsuan parte hartzeko aukera izango dute. Jarduera edo erakusketa horietarako aukeratutako ilustratzaileak Higinia Garay, Josune Urrutia, Idoia Iribertegui, Maite Rosende eta Elisabeth Pérez Fernández dira.

Horrez gain, IRUDIKA Nazioarteko Ilustrazio Topaketa Profesionalak, urtero bezala, PATXANGA jaia antolatuko du Bolognako zentroan, MAMbo Arte Modernoko Museoan, 2023an Euskal Irudigileak elkartearen 20. urteurrena ospatzeko.