FIL Guadalajara: Miren Agur Meabe

Euskara. Kultura. Mundura.

FIL Guadalajara: Miren Agur Meabe
  • 26
    Aza 2022
    04
    Abe 2022
    Guadalajara

Miren Agur Meabe idazleak ´Quema de huesos´ eleberria aurkeztuko du eta FIL Guadalajara azokaren egitarau ofizialeko hainbat ekitalditan hartuko du parte, baita azokaren harira Jaliscon antolatutako jarduera paralelo batean ere. Sektoreko ekitaldi garrantzitsuenetako bat da, eta urtero ehunka egile eta milaka profesional eta irakurle biltzen dituen iberoamerikar literaturaren hitzordu nagusia.

Meabek honako aurkezpen hauetan parte hartuko du Mexikon:

  • Azaroaren 28an, 19:00etan. Poesia Aretoa, goiko solairua, Expo Guadalajara. Aurkezpena Rocio Cerónekin elkarrizketan.
  • Azaroaren 29an, 11:00etan. Ecos de la FIL. Jalisco Preparatoria de Jalisco.
  • Azaroaren 30ean, 19:00etan. E Aretoa, Nazioarteko Arloa, Guadalajarako Erakusketa. ‘Quema de huesos’ liburuaren aurkezpena.

Consonnik argitaratua, ´Quema de huesos´ euskal literaturaren munduan ibilbide luzea egin duen idazle baten azken lana da, berak itzulia. Eleberriak kontatzen du heldutasun betean dagoen emakume batek oroitzapenetan — eskola-egunak, familia-giroa, jolasak, nerabezaroko jarduerak... — bere nortasunaren aztarnak nola bilatzen dituen.

Miren Agur Meabek (Lekeitio, 1962) helduentzat nahiz haur eta gazteentzat idazten du. Besteak beste, ‘Azalaren kodea’ (2001) eta ‘Bitsa eskuetan’ (2011) poema-liburuengatik Kritikaren Saria jaso du, baita Gazte Literaturako Euskadi Saria ere (hiru aldiz). ‘Kristalezko begi bat’ eleberria hainbat hizkuntzatara itzuli da. 2020an, ‘Nola gorde errautsa kolkoan’ poema-liburua argitaratu zuen, Poesia Sari Nazionala irabazi zuena 2021ean. Bere ibilbidean zehar, nazioarteko topaketa askotan parte hartu du, hala nola Dublin Festival Writers (2003), Vjlenjcako XXI. Literatur Jaialdia (Eslovenia, 2006), Edinburgoko Jaialdia (2007 eta 2019), Santa Bárbara eta Renoko Basque Studies Center (2008), Frankfurteko Azoka (2009), Europa Erdialdeko Reading Month Festival (2016), Miamiko Liburu Azoka (2016), Hay Festival (Arequipa-Peru, 2018), Europako Hizkuntzen Nazioarteko Eguna (Cervantes-Paris, 2019). Gaztelaniazko itzultzaile gisa ere aritutakoa da, eta besteak beste Miren Amurizaren ‘Basa’ itzuli du.

Nazioartean liburuaren sektoreko ekitaldirik garrantzitsuenetako batean euskarazko literatura-sorkuntzari ikusgarritasuna emateko xedearekin, Etxepare Euskal Institutua FIL Guadalajaran euskal idazleen parte hartzea sustatzen ari da 2011tik, mexikar eta nazioarteko publikoari azken urteotan arrakasta nabarmenak lortu dituen literaturara hurbiltzeko aukera eskainiz. 2021eko Uxue Alberdiren parte hartzeak lekukoa hartu zien Kirmen Uribe, Arantxa Urretabizkaia, Bernardo Atxaga, Karmele Jaio, Harkaitz Cano, Anjel Lertxundi edo Eider Rodriguez bezalako idazleei.

Harpidetu gure Newsletterrera informazio gehiago jasotzeko

Harpidetu