Euskara kontatzeko moduari erreparatzeko uda-ikastaroa

Uztailaren 9an ´Bikaintasuna Euskal Ikasketetan XV: Nola kontatzen dugu euskara?´ uda-ikastaroa egin zen Donostiako Miramar jauregian. Lau hitzaldi hartu zituen formakuntzak, euskararen markaz, hitanoaz, egungo erronka teknologikoez eta ondareaz jardunez, besteak beste. Izan ere, Etxepare Euskal Institutuak, EHUren Uda Ikastaroekin bat eginik, Bikaintasuna Euskal Ikasketetan ikastaroa antolatzen du urtero, nazioarteko testuinguruetan euskararen irakaskuntzan aritzen diren pertsonen gaikuntza sustatzeko helburuz. Ikastaroak 15. edizioa du aurtengoa, eta, ‘Nola kontatzen dugu euskara?’ izenburupean, nazioarteko irakaskuntza-testuinguruetan edo, oro har, ingurune eleanitzetan euskara kontatzeko moduari egingo dio so. 

Ikastaro honek euskara eta euskal kulturaren irakaskuntzan dihardutenei eta jardungo direnei lanerako eta gogoetarako bide berriak eskaini zizkien. Euskara hizkuntza bizia da, baina euskararen zer irudi helarazten dugu gaur egun? Hainbat adituren eskutik, euskara nola eta nondik kontatzen dugun aztertu zen jardunaldian. Hau da, ikuspegi tradizional batetik kontatzen dugun, ala gaur egungo diskurtso, eredu eta estetiken bidez aurkezteko gai garen.

Euskara hizkuntza modernoa al da? Nola hautematen da? Galdera horien eta antzekoen inguruan hausnartu zuten hizlariek, diziplina ezberdinetatik abiatuta, euskararen iruditeria berreraikitzeko eta gaurkotasunetik kontatzeko estrategiak partekatuz.

Goiz bateko iraupena izan zuen diziplina anitzeko prestakuntzak. Euskal ikasketetako irakasleak, marka-adituak, IKTetan eta ondarean adituak aritu ziren beren jakintzagaiak aurkezten. Gainera, saiootan euskararen eta euskal kulturaren irakaskuntzan jarduteko funtsezko proposamenak, tresnak, eta metodologiak eskaini ziren, adimen artifizialari buruzko jakingarriak barne.

Irene Larraza (Etxepare Euskal Institutuko zuzendaria), Monika Madinabeitia (Etxepare Euskal Institutuko Euskara Sustatu eta Hedatzeko zuzendaria), Jaime Otamendi (Donostia Kulturako zuzendaria), Estitxu Garai (EHUko Bizkaiko Campuseko eta Komunikazioko errektoreordea), Beñat Muguruza (EHUko irakaslea), Urtzi Odriozola (Codesyntax-eko informatikaria) eta Arkaitz Oleak (San Telmo Museoko bitartekaritza arduraduna) izan ziren hizlariak. 

Egitarau osoa eta xehetasun guztiak kontsultatzeko, egin klik hemen.