Oihana Leonet Euskal Herriko Unibertsitateko (EHU) irakasle eta ikertzailea izango da Bernardo Atxaga Katedrako aurtengo gonbidatua. Etxepare Euskal Institutuak City University of New Yorkeko (CUNY) Graduate Center-en sustatutako katedraren baitan, urriaren 5etik 9ra, eleaniztasun garaikideari buruzko mintegi-zikloa eskainiko du. Ikuspegi soziolinguistikotik eta hezkuntzaren ikuspegitik aztertuko du gaia.

Programak euskal testuingurua hartuko du abiapuntu, identitateaz, desberdintasunaz eta hizkuntza-justiziaz hausnartzeko, Latinoamerikako errealitateekin elkarrizketan. Hiztun berrien rola, hizkuntza-errepertorioak, hizkuntza-paisaiak eta hezkuntzak testuinguru eleaniztunetan eta migrazioek markatutako errealitateetan duen eginkizuna ere izango dira aztergai.

Programa

Urriak 5 | 9:00–11:30
Eleaniztasuna bazterretatik pentsatzea

Urriak 6 | 9:00–11:30
Hiztun berriak: nortasuna eta agentzia

Urriak 7 | 9:00–11:30
Hiria irakurri, eskola irakurri. Hizkuntza-paisaiak eta hizkuntzen ikusgarritasuna

Urriak 8 | 9:00–11:30
Ahotsak auspotzen dituzten pedagogiak

Urriak 9
Saio irekia. Ordutegia zehazteke.

Oihana Leonet

Oihana Leonet EHUko Hezkuntza Zientzien Saileko irakasle agregatua da, eta Donostia Research Group on Education and Multilingualism (DREAM) ikerketa-taldeko ikertzaile nagusia. Bere ikerketa testuinguru eleanitzetan hizkuntzen irakaskuntzan eta ikaskuntzan oinarritzen da, pedagogia eleaniztunetan eta hizkuntza gutxituetan arreta berezia jarriz.