Miriam Luki izango da aurten A Coruñako Residencia Literaria 1863 egoitzan hilabeteko literatura-egonaldia egingo duen euskal idazlea. Etxepare Euskal Institutuak eta Residencia Literaria 1863k elkarlanean sustatutako programaren barruan, bere literatura-proiektu berria garatuko du. 2026ko egonaldia azaroan egingo da, eta euskaraz idazten duten egileei zuzendutako deialdiaren barruan kokatzen da.

Miriam Luki

Miriam Luki (Urretxu, 1973) kazetaria eta idazlea da. Gaur egun Galtzagorri euskal haur eta gazte literatura elkartean lan egiten du, irakurketaren bitartekariei zuzendutako proiektuak sortzen eta gidatzen. Orain arte Argialdiak (Susa, 2023), Erreka (Bermingham, 2018) eta Euslandia, unibertso txiki baterako galderak (Mondragon Unibertsitatea eta Lanku, 2010) argitaratu ditu.

Argialdiak, bere lehen narrazio bilduma, 2023an argitaratu zen Susarekin eta urte berean bigarren edizioa kaleratu zen. Gaur egun literatura-bitartekaritzan ere jarduten du, haur eta gazte literaturaren esparruan zein helduen irakurle taldeetan.

Etxepare Euskal Institutua eta Residencia Literaria 1863

Etxepare Euskal Institutuak eta Residencia Literaria 1863k elkarlanean antolatutako egonaldiaren helburua da euskarazko literatura-sorkuntza sustatzea, idazleei beren proiektuetan buru-belarri aritzeko espazioa, denbora eta kulturalki dinamikoa den ingurunea eskainiz.

Aurreko edizioan, Nerea Ibarzabal Salegi izan zen programan parte hartu zuen euskal idazlea. 2025eko azaroan hilabeteko egonaldia egin zuen A Coruñan, bere literatura-proiektua garatzeko.