Sara Zozaya, Arima Soul eta Bengo: Artistas en Ruta programaren hurrengo ziklorako artista hautatuak

Sara Zozaya Donostiako abeslari, konpositore eta multiinstrumentista da. Poparen, folkaren eta elektronika sotilaren artean mugitzen den proposamen pertsonala garatu du urteotan, atmosfera zainduak, ahots intimista eta emozioz betetako kantuak ardatz hartuta. ´Nara´ (2023) diskoarekin bere unibertso artistikoa sendotu ondoren, 2025ean ´attä´ EPa argitaratu du, soinu ambient eta elektronikoagoetara hurbiltzen den lan introspektiboa. Aldaketa, agurra eta eraldaketa emozionala ardatz dituen lan horren bidez, Sara Zozayak bere ibilbideko etapa berri bati ekin dio, euskal musikagintzako ahots berezienetako bat dela berretsiz.  

Arima Soul Zarautzen sortutako musika-proiektua da, Mikel Unzurrunzaga “Makala” eta Lidia Insaustiren eskutik. Soul, R&B, funk eta jazzaren eraginak uztartzen ditu, euskarazko errepertorio propio eta garaikide batean. 2022an kaleratutako ´Arima Soul - 1´ lehen diskoaren ondoren, 2025ean argitaratu dute ´Gaua´, taldearen bigarren lana. Disko horretan euren soinu-unibertsoa zabaldu dute, groovea, soul garaikidea eta funkaren tradizioa uztartuz, eta euskal musikaren panoraman nortasun propioa duen proposamena sendotuz.

Aitor Bengoetxea musikari oiartzuarraren proiektu artistikoa da Bengo. Pop garaikidea, elektronika eta musika urbanoaren eraginak uztartuz, bere belaunaldiko emozioak eta bizipenak jasotzen dituzten kantuak sortzen ditu. 2023an ´Bizirik´ lehen diskoa argitaratu zuen, eta 2024an kaleratutako ´BELHARRA´ lanarekin bere proposamena sendotu eta publiko zabalago batengana iritsi da. Melodia zainduak, letra hurbilak eta nortasun propioa uztartuz, gaur egun euskal musikaren belaunaldi berriko ahots nabarmenetako bat da.