BIME PRO Bogotá 2024: Basque. Music.

BIME Bogota azokaren hurrengo edizioa 2024ko maiatzaren 8tik 11ra egingo da. Izarok BASQUE. MUSIC. plataformak antolatutako showcase-ean parte hartuko du.

Musika Industriaren Nazioarteko BIME Topaketa duela hamabi urte hasi zen Bilbon, eta Amerikako kontinentean hirugarren edizioa ospatuko da aurten. Hitzordu berria 2024ko maiatzaren 8tik 11ra izango da Bogotan.

Euskal Herriko musika nazioartekotzeko Musika Bulegoak, Etxepare Euskal Institutuak eta Eusko Jaurlaritzak sustatzen duten Basque. Music. plataforma Kolonbiako hitzordu honetan egongo da beste behin Latinoamerika eta Euskadiren arteko zubi artistiko eta profesionalak eraikitzeko helburuz.

Izarok 2023ko Durangoko Azokan argitaratu zuen Cerodenero bere azken diskoa aurkeztuko du Kolonbiako hiriburuan maiatzaren 9an 17:00etan eta profesionalen gunean (Plazoleta agertokian). Lan berri hau arrakasta handia izaten ari da zuzeneko emanaldietan.

Maiatzaren 10ean Kuba, Kolonbia eta Argentinako hainbat musikarirekin batera ´Arte y método: cómo hacer grandes canciones´ mahai inguruan parte hartuko du.

Azkenik, Peruko Milena Warthon abeslariarekin egonaldi artistikoa egingo du maiatzaren 11an.