Cratère Surfaces: Focus Pays Basque

Kale arteetako konpainia honek koreografia, musika esperimentala eta zirkoa uztartzen ditu bere ikuskizunetan. Cratère Surfaces jaialdian ‘Lurruna’ aurkeztuko du. Grabitatearen inguruko hausnarketa poetikoa da Lurruna. Gorputzak, objektuak, oreka, desoreka eta fisikaren legeak hartzen ditu abiapuntu, eta joko bisual indartsuak eraikitzen. Pertzepzioaren alterazio batek, moteltze batek, grabitate aldaketa batek, eta birbobinatze efektuek erakusten dute pertsonaien barne egoera. Errealitateen arteko loturetan mugak lausotu egiten dira, posible denaren profilak birdefinituz. 

• Uztailak 2 – 19:30
• Uztailak 3 – 19:30
• Abiapuntua: Rue de La Meunière 2

Bilaka euskal dantza tradizionalaren erroetatik abiatuta gaur egungo hizkuntza koreografikoa garatzen duen konpainia da. Cratère Surfaces jaialdian ´Dirau´ aurkeztuko du. Euskal musikaren erritmoek eta pultsazioek gidatzen dute pieza, gorputzaren mugak eta askatasuna etengabe proban jarriz. Tradizioa ez du ondare geldi gisa ulertzen, mugimenduan dagoen indar gisa baizik; horrela, ´Dirau´ etengabe eraldatzen den identitate bizi baten adierazpen koreografikoa bihurtzen da.

• Uztailak 3 – 21:00
• Uztailak 4 – 18:00
• Tokia: Théâtre de Verdure

Dantza bertikala eta garaikidea uztartzen dituen konpainia da honakoa, hiri-espazioa bere sorkuntzen osagai nagusi bihurtzen duena. Cratère Surfaces jaialdian Geure(R)a aurkeztuko du. Lanak komunitatea eraikitzen duten loturak eta espazio partekatuaren esanahia aztertzen ditu, fatxada bertikalak mugimendurako euskarri bihurtuz. Grabitatearen aurka dantzatzen duten gorputzek elkarrekiko konfiantza, oreka eta elkarlanaren indarra erakusten dituzte, espazio publikoari irakurketa poetiko eta garaikidea eskainiz.

• Uztailak 3 – 22:00
• Uztailak 4 – 22:00
• Tokia: Rue du Commandant Audibert

Deabru Beltzak 1996an sortutako kale-antzerki konpainia da. Harrezkero, hamar ikuskizun sortu ditu, 3.000 emanaldi baino gehiago eskaini, eta mundu osoko 35 antzerki-konpainiarekin baino gehiagorekin aritu da elkarlanean. Cratère Surfaces jaialdian Su Talka aurkeztuko du. Talka, marruskadura eta perkusioa dira ikuskizunaren abiapuntua: danborren talkatik sortutako txinpartak energia bihurtzen dira, sua eta erritmoa bat eginez. Koloreen, argiaren, usainen eta soinuaren bidez eraikitako kale-esperientzia murgiltzailea da, non piroteknia eta koreografia zehaztasun handiz uztartzen diren ikuslea ikuskizunaren erdian kokatzeko.

• Uztailak 3 – 22:00
• Abiapuntua: Place Henri Barbusse

Osa+Mujika dantza garaikideko konpainia da, mugimenduaren bidez gaur egungo gizartearen kezkak eta kontraesanak taularatzen dituena. Bere sorkuntzek hizkuntza fisiko indartsua, umorea eta irudi eszeniko zainduak uztartzen dituzte. Cratère Surfaces jaialdian Tupper aurkeztuko du. Eguneroko objektu xume bat abiapuntu hartuta, lanak kontsumoaren, gehiegikeriaren eta pilaketaren inguruko iruditeria eraikitzen du. Gorputzaren eta objektuen arteko harremanak etengabe eraldatuz, mugimenduak eta koreografiak eguneroko bizitzaren inertziak zalantzan jartzen dituzte, ironiaz eta energiaz beteriko ikuskizun batean.

• Uztailak 2 – 19:30 eta 22:30
  • Tokia: Place de l´Hôtel de Ville
• Uztailak 3 – 19:30 eta 21:30
  • Tokia: Place des Martyrs de la Résistance

Cratère Surfaces jaialdian ‘Los Perros’ aurkeztuko du Led Silhouette konpainiak, Marcos Morauren ideia eta zuzendaritza artistikoarekin sortutako lana. Gaur egungo gizartearen ziurgabetasunaren eta deshumanizazioaren aurrean, erresistentziarako bidea proposatzen du piezak. Elkar aurkitzen duten, erori eta altxatzen diren, dantzaren bidez maitasuna, eskuzabaltasuna eta konpromisoa aldarrikatzen dituzten bi gorputzen kontakizuna da. Errepikapenaren eta katarsiaren indarraz baliatuta, ‘Los Perros’-ek mugimendua bihurtzen du belaunaldi oso baten zaurgarritasuna, amorrua eta bizitzeko gogoa adierazteko tresna.

• Uztailak 2 – 22:30
• Uztailak 3 – 23:00
• Tokia: Cour Fort Vauban

Cratère Surfaces jaialdian Andante aurkeztuko du Markeliñek. Itsasoak lehorrera ekarritako zapata anonimo batzuk dira ikuskizunaren abiapuntua. Norenak dira? Zer istorio gordetzen dute? Antzerki bisuala, maskarak eta zuzeneko musika uztartuz, gerrak, erbesteak eta migrazioak markatutako bizitzen arrastoak ekartzen ditu oholtzara, hitzik gabeko kontakizun hunkigarri batean. Lau hamarkadatik gorako ibilbidea duen kale-antzerki konpainiak berezko duen poesia bisualarekin eta irudi indartsuekin eraikitzen du memoria eta enpatiarako gonbita.

• Uztailak 2 – 20:30
  • Abiapuntua: Parc du Bosquet
• Uztailak 3 – 20:00
  • Abiapuntua: Place Henri Barbusse