Txileko Viña del Mar hirian, uztailean zehar eskainiko den euskal zinema zikloa antolatu da, irailean egingo den FICViña nazioarteko zinema jaialdiarekin lotuta. Amama, Oreina eta Dantza euskal filmak ikusi ahal izango dira bertan, eta uztaileko hiru ostiraletan izango dira emanaldiak.

Etxepare Euskal Institutuak egindako Ezohiko Deialdiaren baitan Argentina, Txile eta Uruguaiko euskal etxeetan irakasle ari diren Euskara Munduan programako ikasleek uztailaren 26tik 28ra egingo dituzte euren euskara maila egiaztatzeko probak, Buenos Airesen. Deialdi berezi honen arduraduna Euskara Munduan programako erreferente den Jose Francisco Zinkunegi izango da eta aztertzaileak, berriz, Irene Lopez de Vicuña eta Sabrina Otegui irakasle argentinarrak.

Svetlana Biba eta Txema Perez aktoreek zuzentzen duten eta Bilbon egoitza duen 2Theatre nazioarteko antzerki konpainiak Interbeing lana estreinatuko du Edinburgoko Fringe jaialdian. Antzezlan horrek giza-gatazkaren erraietan arakatzen duen istorioa kontatzen du eta ikusgai izango da Edinburgoko Assembly Rooms-eko Ballroom aretoan, abuztuaren 1etik 25era. 2theatre-rekin batera aurten beste hainbat euskal artista eta konpainiek erakutsiko dute euren lana Fringen, #ScotlandGoesBasque programaren eskutik.

Etxepare Euskal Institutuak, urtero bezala, Euskal Irakaskuntzaren inguruko ikastaro bat antolatu du UPV-EHUko Udako Ikastaroekin lankidetzan, Garbiñe Iztueta Goizueta, Etxepare Euskal Institutuko Euskararen Sustapen eta Hedapenerako zuzendariaren gidaritzapean.  Ikastaroaren helburua Etxepare Euskal Institutuak munduan zehar duen irakurletza sareko euskara eta euskal kultur irakurleei formakuntza ematea da. Hala ere, ikastaroa interesa duen edonorentzat dago zabalik.  

Iñigo Urkullu Lehendakariak harrera egin dio gaur goizean, Lehendakaritzan, Quebecetik Euskadira etorri den delegaritzari. Hizkuntza, kultura eta sormen industrien alorreko 19 erakundetako ordezkariek ostiralera arte Gasteiz, Donostia eta Bilbon egingo diren kultur topaketa profesionaletan hartuko dute parte, 60tik gora euskal eragilerekin batera.

Sunny Side of the Doc dokumentalen nazioarteko azoka garrantzitsuenetariko bat da eta bertan izango da beste urtebetez euskal ikus-entzunezkoen sektorea Eiken (ikus-entzunezkoen klusterra), Zineuskadi eta Etxepare Euskal Institutuak sortu eta bultzatutako Basque Audiovisual izenpean.

Janice Parker Koreografo eskoziarra Euskal Herrira etorri da ekainaren 17 eta 21 bitartean, Scotland Goes Basque egitasmoan parte hartuko duen HQPC kolektiboarekin lan egiteko. HQPC antzerki-dantza kolektiboa, izen bera duen “Habrá Que Ponerse Cachas” antzezlanari ikuspuntu berri bat eman nahian ari da lanean Janice Parkerren laguntzarekin. Koreografoak esperientzia handia du hainbat dantza proiektuetan eta antzezlanaren oinarria hartuz testuinguru desberdin batean kokatzen saiatzen ari da.

Estatu mailako kultur institutuek historiako lehen batzarra egin dute ekainaren 17an, astelehena, Kataluniako Ramon Llull Institutuaren egoitzan. Bilera horrek bakoitzaren lan ildo estrategikoen, erronken eta helburuen berri izateko balio izan du.

Edinburgh International Film Festival (EIFF) jaialdi entzutetsuan euskal zineak toki berezia izango du #ScotlandGoesBasque programaren eskutik: datozen egunotan Koldo Almandozek bere Oreina eta Iban del Campok Espedizio handia film laburra aurkeztuko dituzte, eta zine industriaren hainbat profesional bertaratuko dira Edinburgora euren lanak aurkezteko. 

Etxepare Euskal Institutuak eta Edinburgoko Unibertsitateak antolatuta, nazioarteko mintegi bat egingo da Edinburgoko Unibertsitatean urriaren 16 eta 17an. Bai bertara ikusle bezala joateko, baita mintegiko hitzaldietan aditu bezala parte hartzeko ere, izen-emateak irekita daude gaurtik hasita.